අනුරාධපුර බන්ධනාගාරය තුළ මේ වන විට සිටින දේශපාලන සිරකරුවන් 10 දෙනෙකු තම ගැටලු විසඳා දෙන මෙන් අඛණ්ඩ උපවාසක් ආරම්භ කර අදට දින 36ක් ගත වී ඇතත් බලධාරීන් මේ සම්බන්ධව කිසිඳු අවදානයනක් යොමු කර නැත. උපවාසයේ නියැලෙන දේශපාලන සිරකරුවන්ගේ ඉල්ලීම වන්නේ එක්කෝ තමන්ව නිදහස් කරන ලෙසත් නැතිනම් තමන්ව පුනරුත්ථාපනය සඳහා යොමු කරන ලෙසය.
රනිල් - මෛත්‍රී ආණ්ඩුව බලයට පැමිණිමට පෙර ලබාදුන් එක් මැතිවරණ පොරොන්දුවක් වූයේ මෙම ගැටලුව විසදනවා යන්නයි. පුරසාරම් දෙඩුවත් තවමත් මේ වන විට ඔවුන් බලයේ සිටින්නේ කිසිදු දේශපාලන සිරකරුවෙකු බන්ධනාගාරයන් තුළ නොසිටින ආකාරයටය. මෙරට පැවති තිස් අවුරුදු යුධ වාතාවරණය හුදු සාමාන්‍ය ජනයාගේ අවශ්‍යතාවයක් මත හෝ සිංහල, දෙමළ, මුස්ලිම් ජනයාගේ උවමනාවට සිදු වූවක් නොවේ. මේ පිටුපස හුදෙක් දේශපාලන හස්තයන් මෙන්ම හුදෙක් දේශපාලන, සමාජ, ආර්ථික කරුණු කාරණා බොහොමයක් ඇත. මේ වන විට යුද්ධය අවසන් වී යැයි බොහෝ දෙනා පිළිගෙන ඇත. නමුදු දේශපාලන, සමාජ, ආර්ථික සංසිද්ධි මූලික කරගනිමින් එක්තරා පිරිසක් තවමත් බන්ධනාගාර ගතකොට ඇත. නමුත් මෙරට සිටි, සිටින ධනේෂ්වර පාලකයින්ට මෙම දේශපාලන සිරකරුවන්ගේ ප්‍රශ්නය අදාළ නොවීම බරපතල ගැටලුවකි.
මෙම දේශපාලන සිරකරුවන් අතර ඇතැම් පුද්ගලයන් අවුරුදු 20ක් තරම් දීර්ඝ කාලයක් සිරගතව සිටින්නේ කිසිදු නඩු විභාගයකින් තොරවය. මේ වන විට අනුරාධපුර බන්ධනාගාරයේ උපවාසයේ නියැලෙන දේශපාලන සිරකරුවන් ආහාර වර්ජනය කර ඇති අතර ප්‍රථමාධාරද ප්‍රතික්ෂේප කරමින් සේලයින් ලබා ගැනිමද නවතා ඇත. ඔවුන්ගේ මෙම අරගලයට සහයෝගය දක්වමින් මැගසින් බන්ධනාගාරයේ සිටින රැඳවියන් 43ක් ද ආහාර වර්ජනය කරමින් අරගලයට එක්ව තිබේ.
මෙම අරගලයට සහය දක්වමින් හා දේශපාලන සිරකරුවන්ගේ ගැටලුවට කඩිනම් විසඳුම් ලබාදෙන මෙන් ආණ්ඩුවට බලපැම් කිරිම සඳහා අනුරාධපුර නගරයේ 2018-10-05 වන දින විරෝධතා උද්ඝෝෂණයක් සිදු කරනු ලැබු අතර, එය සංවිධානය කරනු ලැබුවේ දේශපාලන සිරකරුවන් නිදහස් කර ගැනීමේ සංවිධානය විසිනි. මෙම විරෝධතා උද්ඝෝෂණයට සම අයිතිය ව්‍යාපාරයද සහභාගි වි සහය දක්වන ලදී.
0 comments:
Post a Comment