මාළඹේ SAITM ආයතනයේ පෞද්ගලික වෛද්‍ය විද්‍යාලයක් ඇතැයි උසස් අධ්‍යාපන අමාත්‍යවරයා මෙන්ම ජනාධිපතිවරයා විසින් ද පිළිගනු ලැබීය. පසුගිය අපේ‍්‍රල් මස ශිෂ්‍ය ශිෂ්‍යාවන් 9 දෙනෙකුට ඊට ඇතුළත් වීම සඳහා ශිෂ්‍යත්ව ප‍්‍රධානය කිරීමක් ද සිදුකරන ලදී. ශිෂ්‍ය ව්‍යාපාරය ඇතුළු බලවේගයන්ගේ සටන් හමුවේ දැවැන්ත ජනතා විරෝධයක් පවතින, රාජ්‍ය අනුග‍්‍රහය ලැබූ මෙම ආයතනය සිදුකළ සියල්ල දැවැන්ත වංචාවන් බවට මේ වන විට තොරතුරු හෙළිදරව් වී ඇති බව වෛද්‍ය පීඨ ශිෂ්‍ය ක‍්‍රියාකාරී කමිටුවේ කැඳවුම්කරු නජිත් ඉන්දික සහෝදරයා පෙන්වාදෙයි.
2009 මැයි මස 10 වන දා සන්ඬේ ටයිම්ස් (Sunday Times) පුවත්පත පළ කළ දැන්වීමක් මගින් ඔවුන් සඳහන් කළ පරිදි මෙම ආයතනය රුසියාවේ නිෂ්නි නොවිගොරොද් වෛද්‍ය ඇකඩමියට අනුබද්ධ බවත්, මෙහි පිරිනමන උපාධිය සඳහා ශී‍්‍ර ලංකා වෛද්‍ය සභාවේ (SLMC) අනුමැතිය ඇති බවත් නිවේදනය විය. තවත සිසුන් මුදලට බඳවා ගැනීම සඳහා මෙම ආයතනයට අනුබද්ධ ශික්ෂණ රෝහලක් ඇති බවද ප‍්‍රකාශ කරන ලදී. ඊට අමතරව 2011 අගෝස්තු 30 උසස් අධ්‍යාපන අමාත්‍යාංශයේ අත්සනින් යුතුව නිකුත් කළ අංක 1721/19 ගැසට් පත‍්‍රය මගින් මෙම උපාධි කඩයට වලංගු භාවයක් ලබාදුණි. එම ගැසට් පත‍්‍රයට අනුව මාස 18 ක් තුළ ප‍්‍රධාන කරුණු 8 ක් අදාළ ආයතනය මගින් සපුරාලිය යුතුය. නමුත් මේ වන විට අදාළ කාලය පසුවී ඇතත් කොන්දේසි සපුරා නොමැති බැවින් මාළඹේ SAITM ආයතනයට අමාත්‍යවරයා අසීරුවෙන් ලබාදුන් නිළ වලංගු භාවය ද නැත.
තවද ශී‍්‍ර ලංකා වෛද්‍ය සභාව පුවත්පත් නිවේදන මගින් දිගින් දිගටම මෙම ආයතනය වෛද්‍ය විදුහලක් ලෙස පිළිනොගන්නා බවට පැහැදිලි නිවේදන නිකුත් කළ බවත්, රුසියාවේ අදාළ විශ්වවිද්‍යාලයේ අධ්‍යක්ෂක ඇලෙක්සි පොස්ටිනිකොව්ගේ අත්සනින් නිකුත් කළ ලිපියක් මගින් සහ රුසියාවේ ශ‍්‍රී ලංකා තානාපති උදයංග වීරතුංග මහතාගේ අත්සනින් 2012 නොවැම්බර් 07 වැනිදා නිකුත් කළ ලිපියක් මගින් මාළඹේ ී්ෂඔඵ ආයතනය සහ එම ආයතනයේ කිසිඳු සම්බන්ධයක් නොමැති බව සඳහන් කර ඇති බවත් ඔහු වැඩිදුරටත් පැවසීය.
එමෙන්ම සෞඛ්‍ය අමාත්‍යවරයා පාර්ලිමේන්තුවේදී මාළඹේ උපාධි කඩයට අනුබද්ධ ශික්ෂණ රෝහලක් නොමැති බව නිළ වශයෙන් පිළිගෙන ඇත.
මෙම හෙළිදරව් වීම් හරහා, අධ්‍යාපනය වැනසීමට මග හෙළිකරන මාළඹේ උපාධි කඩයේ යථාර්ථය තවදුරටත් හෙළිදරව් වන බවත්, ඉදිරියේදී ඊට එරෙහිව ගෙනගිය අරගලය ත‍්‍රීව‍්‍ර කරමින් නව මුහුණුවරකින් මාළඹේ උපාධිකඩය අහෝසිකරන තුරු අඛණ්ඩ අරගලයක් අරඹන බවත් නජිත් ඉන්දික සහෝදරයා පැවසීය.
0 comments:
Post a Comment