වකුගඩු රෝගයේ ව්‍යාප්තියට ග්ලයිෆොසේට් සැලකිය යුතු දායකත්වයක් සපයා ඇති බව පසුගිය කාලය පුරාම ආන්දෝලනයට ලක් වූ පුවතකි. වල් නාශකයක් වන ග්ලයිෆොසේට් හෙවත් රවුන්ඩෆ් අන් කෘෂි රසායන වර්ගවලට වඩා කීප ගුණයක් විෂ සහිතය. ඇමරිකාවේ කැලිෆෝනියා ප්‍රාන්තයේ පමණක් ග්ලයිෆොසේට් හේතුවෙන් මොන්සැන්ටෝ සමාගමට ගොණු කළ නඩු 500කට අධික ප්‍රමාණයක් ක්‍රියාත්මක වේ. ග්ලයිෆොසේට් හේතුවෙන් පිළිකා රෝගියෙකු වූ ඇමරිකානු ගොවියෙකුට වන්දි ගෙවීමට අධිකරණය නියම කළ පුවත මෙරට මාධ්‍ය ජාලා තුළ ද ප්‍රචාරය විය.
වකුගඩු රෝගයට රැවටිලිකාර පැලැස්තර විසඳුම් දෙන ලංකාවේ පාලකයො වරින් වර යම් යම් කෘෂි රසායන සඳහා තහනම් නියෝග නිකුත් කළ අතර ඊට සමගාමීවම තහනම් කළ කෘෂි රසායනය වෙනුවට ඊටත් වඩා භයානක තවත් නිෂ්පාදනයක් හඳුන්වා දෙන්නට යෙදුණි. 2010 වසරේ පැරකොට් තහනම් කොට ග්ලයිෆොසේට් හඳුන්වා දුන්නේ එසේය. 2015 ග්ලයිෆොසේට් ද තහනම් කෙරිණි. නමුත් 2018 දී නැවත එම ග්ලයිෆොසේට් තහනම ද ඉවත් කෙරිණි.
ග්ලයිෆොසේට් තහනම් කළේ ම එය විනාශකාරී බව ඔප්පු වූ හෙයිනි. නමුත් මොන්සැන්ටෝ සමාගමේ කොමිස් කුට්ටි මගින් ග්ලයිෆොසේට් අනතුරු දායක නොවන ඉතා යහපත් දෙයක් බවට පත් විය. කෙතරම් ද යත් පලිබෝධ නාශක රෙජිස්ට්‍රාර්වරයා මාධ්‍ය හමුවක් පවත්වා ග්ලයිෆොසේට් දියකර පානය කළ හැකි බව පැවසීය. නවීන් දිසානායක වැවිලි කර්මාන්ත ඇමතිවරයා ග්ලයිෆොසේට් විෂ සහිත බව තමන්ට කිසිවෙක් දැනුම් දී නැති බව සඳහන් කළේය. කෙසේ හෝ අවසානයේ ග්ලයිෆොසේට් තහනම ඉවත් කෙරිණි.
ග්ලයිෆොසේට් තහනම ඉවත් කළ හොත් තමන් දේශපාලනයෙන් ඉවත් වන බව අතුරලියේ රතන හිමි විසින් ප්‍රකාශ කරන ලදී. මාධ්‍ය ඉදිරියේ කඳුළු කැට පවා සට සට ගා සලන ලදී. නමුත් ග්ලයිෆොසේට් තහනම ඉවත් වූ පසු එම විරෝධය ද ඉවත් විය. ආණ්ඩුවට විරුද්ධව නැගෙන ජනතා විරෝධයක් කළමනාකරණය කිරීමට උන්වහන්සේට ඇත්තේ පුදුම ප්‍රාතිහාර්ය ශක්තියකි. දැන් මැතිවරණ ව්‍යාපාරය සඳහා වළඳන්නට රතන හිමියන්ට වෙන මස් කට්ටක් ලැබී ඇත.
දැන් ග්ලයිෆොසේට් ටොන් ගණනින් නැවත මෙරටට ආනයනය කරයි. ග්ලයිෆොසේට් ආනයනය සඳහා සිපෙට්කෝ සමාගමට කැබිනට් මණ්ඩලය අනුමැතිය ලබා දී ඇත.මෙසේ අනුමැතිය ලබා දී ඇත්තේ ඕස්ට්‍රේලියා‍වට අපනයනය කළ හැකි මල් හා විසිතුරු පැළෑටිවල වර්ධක ප්‍රචාරණය විය හැකි අයිතමවල ප්‍රරෝහණ හැකියාව නිෂ්ක්‍රීය කිරීමට භාවිතා කිරීම සඳහා ග්ලයිෆොසේට් ලීටර 200ක් අපනයන සංවර්ධන මණ්ඩලයේ නිර්දේශය මත අදාළ අපනයනකරුවන් වෙත ලබා දීම සඳහාත්, උක් වගාවේ සුදු පත්‍ර රෝගය පාලනය කිරීම සඳහා ග්ලයිෆොසේට් ලීටර 31,815 උක් පර්යේෂණ ආයතනය වෙත ලබා දීම සඳහාත්, වැලිගම පොල් කොළ මැළවීමේ රෝගය මර්දනය කිරීම සඳහා ග්ලයිෆොසේට් ලීටර 200ක් පොල් පර්යේෂණ ආයතනය වෙත ලබා දීම සඳහාත්, ඒ සම්බන්ධයෙන් පත් කර ඇති විශේෂඥ කමිටුව මඟින් නිර්දේශිත කොන්දේසිවලට යටත්ව වාර්ෂිකව ග්ලයිෆොසේට් ලීටර 32,215ක් ආනයනය කර සිපෙට්කෝ සමාගම මඟින් බෙදා හැරීම පිණිස වැවිලි කර්මාන්ත අමාත්‍ය නවීන් දිසානායක සහ සංවර්ධන උපායමාර්ග සහ ජාත්‍යන්තර වෙළඳ අමාත්‍ය මලික් සමරවික්‍රම ඉදිරිපත් කළ ඒකාබද්ධ යෝජනාව අමාත්‍ය මණ්ඩලයේ අනුමැතිය හිමිවී ඇත.
0 comments:
Post a Comment